狗耳 dog-ear

以前返大陸旅遊, 最傷腦筋就係去廁所. 我地男仕小解就容易解決, 但係要開大時都好麻煩架.
因國內有親戚, 我八十年代開始已經經常北上, 以前佢地連屋企都冇自己廁所, 要落樓下廁所攪掂. 細個去就梗係好唔自在啦, 臭都唔提, 果時人又矮, 又怕跌落屎坑, 好驚架. 大陸絕大部份都係用旱坑廁, 當佢每日清一次, 都起碼積左一日嘛, 差錯腳不得了!

有時去郊區名勝旅遊, 果D 坑廁仲係依山崖而建, 你排出既野會落入一個基本上係聽唔到聲咁深既坑裡頭, 粉身碎骨, 好不恐怖.

仲有收費廁所: 小便五仙, 大便一毛. 入去時所長會高聲問你 "唉~ 你是大便還是小?" "小便..." 我唯有服從地回答.

後來開始有水廁了, 個廁所理應冇咁臭, 但又唔係喎, 都仲係好臭! 唔計痾出界果D, 原來因為佢地水廁既沖水, 正確黎講係流水, 水力唔夠強, 佢地亦都冇咁多又軟又薄既廁紙, 而係用草紙. ?完之後唔可以掉入馬桶, 因為會塞住, 所以會掉落廁所既垃圾桶, 結果攪到又係咁臭~

然後大便又再有等級之分了: "你要蹲, 還是坐?" 照舒適程度坐廁應該係高級DD, 不過除非係高級酒店, 小弟都認真唔建議各位用坐廁. 既然入到去你都唔敢坐, 不如就揀去?下算喇.

其實講到呢度已經講到大約九五年左右, 當時城市大量興建大型商場, 廁所格局同香港都已經差唔多, 仲有最大既唔同就剩返服務提供者同使用者既習慣喇.

有次我去一個五星級酒店飲野, 去L大堂廁所時, 穿著整齊制服既侍應生晌我入門口之際好有禮貌咁高聲問我 "先生, 你大便嗎?" 我心諗唔係嘛, 仲黎哩套, 我細個時俾你問唔夠乎!? 我不服氣咁答 "是!" 咁我立即明白, 原來星級服務係包括---一卷廁紙雙手奉上.

後來二千年, 我去北京玩, 去故?行足一日有D急, 於是就去會一會呢個皇家廁所. 入到去車水馬龍不在話下, D人排隊入廁格係真係排到入廁格!! 因為廁格D 門係爛晒! 難得入面個亞哥仲可以自在咁繼續排便, 佢頂得我地順, 但我清清楚楚咁見到佢打出個大Ｍ字咁既情境就真係頂佢唔順喇!

以上都係一D 我晌大陸廁所比較深刻既記憶, 假如各位睇完仲覺得小菜一碟的話, 不妨一陣去嗽返個咖哩飯應一應佢丫.